Hönnuðurinn Valdís Steinars tilnefnd sem nýstirni ársins hjá Dezeen
Hönnuðurinn Valdís Steinarsdóttir er tilnefnd sem nýstirni ársins hjá hönnunartímaritinu Dezeen. Kosning fer fram á heimasíðu miðilsins og getur því almenningur gefið Valdísi atkvæði sitt þar, en kosningu lýkur 12. október næstkomandi.
Í samtali við Vísi segist Valdís þetta vera mikinn heiður en fyrr á þessu ári vann hún sænsku hönnunarverðlaunin Formex Nova. Valdís er tilnefnd ásamt fjórum öðrum hönnuðum og hönnunarteymum í flokknum "Emerging Design Studio of the Year" og í fyrsta sinn í ár býður Dezeen upp á almenna netkosningu á heimasíðu sinni.
Valdís hefur vakið mikla athygli fyrir verkefni sín Bioplastic Skin, Horsehair project, Just Bones og ASMR U Ready? sem hún sýndi einmitt á HönnunarMars í ár ásamt því að hanna verkið Torg í speglun á Lækjartorgi með Arnari Inga Viðarssyni. Valdís spyr gagnrýnna spurninga í gegnum verk sín um neyslu dýraafurða og umhverfissjónarmiða.
Það er fyndið að hugsa til þess að þegar ég var að taka mín fyrstu skref sem hönnuður var eitt af mínu stærstu markmiðum að fá verkefnin mín birt á Dezeen. Þannig mér finnst þetta hálf óraunverulegt og ég er í ennþá að klípa mig í höndina yfir þessum þessari viðurkenningu, því bara það að vera tilnefnd er sigur fyrir mig.
